Lango Web

The Independent Voice of Lango, Northern Uganda, since 2007

LC12 report presented to Tekwaro Lango

The steering committee of Lango Conference 2012 (LC12) has presented the conference report and accountability to the council of Lango clan leaders (Owitong).

The ceremony took place in Lango Cultural Centre in Lira on Friday 22 March 2013. The meeting was chaired by the Speaker of Tekwaro Lango Wakili Okello and attended by Won Nyaci, Won Deo Yocam Odur, Prime Minister of Tekwaro Lango Col (Rtd) Tony Otoa and clan leaders from all the eight districts of Lango.

Here is the full report (in Leb Lango) as presented by Dr Engineer Michael Odongo

REPORT BOT COUNCIL O’WITONG IKOM COKERE A’LANGO ADWONG (LANGO CONFERENCE) AME OBIN OBEDO ININO DWE 27-29 DECEMBER 2012, I UGANDA TECHNICAL COLLEGE LIRA

Pagi Kop: Lango Onote Pi Dongo Paco
An Awitong Eng. Dr. Michael M. Odongo Okune, Awitim me Lango
Adwongkom Yuba me Cokere LC12
Friday, 22.02.2013

Won Deo Won Kwogo me Lango, Adwong Yosam Odur Ebii
Prime Minister Te Kwaro Lango, Awitong Col.(Owe) Tony Otoa
Owi Jang Tic Apapat i’ Mampici a’Won Nyaci
Oka wang Abumente Imalu kede Ipiny irwom ducu
Otel Dini Apapat
Owitong kede Rwode Ducu
Otela Mon kede Bulu
Mon kede Coo,

Mia awaka adwong meicel kede yom yic me an icung inyim wu tin kan pi yaro botwu ripot a’Steering Committee me Cokere Adwong a’Lango ame obin obedo pi nino adek kun cakere inino dwe 27 te tum inino dwe 29 December 2012 i’ UTC Lira. Te Kwaro Lango en obin olwongo cokere ni ame obin oguru karacel otela me Lango iryonget apapat pi noto tam ikom tute me dongo lobo Lango. Pagi kop me cokere ni onwongo tye ni LANGO ONOTE PI DONGO PACO. Guti kop ame jingo te pagi kop man onwongo tye gin angwen kit man:

1.     LOC ME TEKWARO KEDE JAMI ABECO I TEKWARO WA

2.     LONYO PI DONGO LOBO

3.     NGOLLO KOP ATIRA KEDE LOC

4.     MEDDO TEKO WA I YORE APAPAT PI ANYIM

Tic atin atye kede en me yaro inyim wu kan report em Cokere acalo wan rik ownongo acima ibotwu me youbu cokere. Buk adwong ame ripot tye iye en akelo botwu kun amio copy mere bot Won Deo kede Prime Minister. Yeya wunu arye iwiewie ngo ame tye i buki.

Cokere obin ocakere kede me abulu inino dwe 27.12.12 te tum ime ajo adongo inino dwe 28 kede 29 December 2012. Bulu obin obedo aromo 500 iwite kun ya iyi atekere, dini apapat kede iryongetogo atye i Lango kan. I cokere kokome ame cakere inino 28 December, otela obin oya iyi atekere, abumente atino kede adongo, dini, otim biacara, medo ocele apol ata oya i’paco kan kede inge pii iwel akato 1,000 oko nino inino.  Adwong Prime Minster Tony Otoa en obin lwongo cokere abulu kun kok botgi pi gwoko te Kwaro a’Lango polere wok woro, pi kare me anyim. Rev Milton Ogwal obin ocung akaka Bishop Tom Okello pi cego cokere ni. Pwony apapat obin omio bot bulu kun iyi akina otela ame omio pwonyi onwongo tye iye nyako acil aloo i Uganda, Phiona Bizzu me atekere Banya ame opori bulu kwo mere ame oweke ekanyakino naka etunu ka deo mere ni ka kono bedi ebedo atin kic. Pwony okene onwongo tye ikom pwonyere, tic cing, te kwaro,  dongo lobo kede loc. Bulu dang obin ocoo moka gi ikom kodi Lango ango agin omito ikare me anyim.

Cokere adwong obin otero nino aryo kun Won Deo oyabo inino dwe 28.12.12 ame loko lok atek pi kop me ropo te Kwaro a’ Lango.  Adwong Lobo obin ocego cokere ni i’odiko me inino dwe 29.12.12 kun loko atek okop me te Kwaro, wii bie, dongo lobo kede lweny ikom two jonyo. Pagi kop ame mako anyim a’Lango ngat ame omio obin obedo Prof. Opio Odongo me Aboke. Odiro apapat ame obedo otino Langi ipaco kan kede en oya inge pii obin omio pwony bot lwak kun oyaro adwogi ikweda gi ikom ryeko apapat ame room kelo dongo lobo, yubu loc kede ber bedo alwak i’Lango kan. Cokere obin opokere iyie angwen pi laro kop atut ikom guti acel acel me pagi kop ame te bino miyo moka apol ata pelo oko ibot Lwak. Cokere dang obin owinyo kop ame oya ibot otino Langi ame bedo itim inge pii kun gin omio tam gi ikom ngo aromo dongo Lango wek woti anyim.

Cokere ni obino acalo adwogi me neno akwiri iwang abit kede tam atut a’ Won Deo wa me Lango ame obin oweko en opelo kede waraga mere inino dwe 25.1.12 kun kelo bot Langi tam me lwongo cokere wek lar ote moko tam ikom peki a’Langi. Won Deo yie tye cwer atek ikom peki adong ogomo gony gi i’Lango kan woki ame oweko rwom me kwo adano odok cen atek. Wan Langi otye rok nama 6 i’Uganda kan iwel jo million aryo iwite kun pol gi bulu atic cing oremogi. Wel jo mede imwaka mwaka i’pacen 3.5 kun Uganda tye mede ka i pacen 3.2. Man oweko lobo wa ame tye ka 12,800Km2 (acre 3,163,008) tye adoko ding ame mito tam atut iyore me tic kede aber.Can tye i’pacen 60 kun I Uganda tye ka  pacen 34. Otino amwaka gi peru oromo abic too gin 177 kun me Uganda too ka 134. Okwan primary tye ka pacen 47.1 kun me Uganda tye malo i pacen 57.4. Two jonyo tye malo atek i pacen 8.3 kun I Uganda tye piny I pacen 6.4. Cem amio gupu ikom dano ocamo ka aromo gupu 1008 kun me Uganda tye 1853. Peki ni polere oya ikom anyoba nyoba me lobo ame obedo timere angec polere wok cakere imwaka 1971. Peki  adek adong oweki Lango bur atut woki aye nek ame Amin oneko kede otela me Lango irwom apapat pi mwaka 9 cakere i’ 1971, kwo dok ame olok oketo ikom Lango kede lweny a’Kony ame oryemo jo apol ipaci gi kede oony aremo alit woki.

Pi mano Te Kwaro obedo kede twero me lwongo cokere ni i’cik me lobo ame olwongo ni Institution of Traditional and Cultural Leaders Act, 2011 cura 9 ame yeyi oloc me te Kwaro moro nu me yele ikop me dongo lobo kede medo lonyo bot jo gi agin oloo. Cokere olubo tyen en acwany bed London imwaka 2007 ame olaro iye  peki ame lweny okello i’Lango dang ote moko ni mano myero dong cokere ocele bed paco. Cokere calo magu ber dang rwate kede Te Kwaro me Lango ame mito kare ikare bedo piny me nyamo lok akwako adwoloro ni, aporere Wii Otem i paci wa.

Tam a’ Won Deo ni obin onwongo cwak adit ibot Adwong Preciden wa me Uganda Gen Kaguta Yowei Museveni ikare ame Won Deo Olime i oot Ker me Uganda Nakasero inino dwe 14.2.12. Cwak odany dang obin oya i bot wun Owitong me Lango i’ Cokere me Council wu ame obedo inino dwe 12.5.12 kan ame dang wun ite moko jo ame ayubu Cokere aromo 72 kun ocima me bedo Adwong Kom. I’Council wu ni dang ite moko wunu jang tic 11 apapat me kubu yika ni.  

Oyub cokere ni obin otio tic atek pi mwaka acel iyul me miyo yika cobere apwot. Adwong Edola Bosco me Omolo Odyakol obin ojalo Hotelere Margeritta ame tye i Junia Kwota pi rwate Oyub Cokere pi kare i kare. Atema tema obedo dwong twatwal ame oya ibot omego kede amego wa mogo ame ateni obin oremo ote bedo gegeco kop me cokere ni ageca te miyo goba odany pelo oko iye. Pi dwir agoba kun kare ikare lanyo ateni oko, ote bino miyo wan oyub cokere gorode doko ayot. Dwon goba onwongo longo atek kato me ateni oko akadi ateni red ni ngo pe dong onwongo winyere. Ento pi mara Acwec Akwoo me Polo ote miyo Cokere tum apwot kun kwanyo lewic iwi wa oko pi atwali.

Yubu cokere a’lwak acalo mani pe yot dang omio wa otagere twatwal. Myeka wa onwongo tye pi wele 500 pi nino abulu kede 1,000 pi nino acel acel pi Cokere adwong. Omio ote  yubu bajet me Ushs.450million iyi acaki wa me tic idwe me abicel. Gen wa onwongo tye ni pol cente wa kede jami amite pi cokere bino ya ibot atekere acel acel iwel me Ushs 500,000/=. Pi rucu rucu ame obin otugere iyi akina oloc me Te Kwaro man pe obin otiye imiti wa. Obin ongolo jami okene oko i bajet ote dwogo i Ushs250million ento man dang pe obin olare. Kadi do bed amano fund raising dinner me nino dwe 5.10.12 obin omio wa Ushs. 29,650,000 akome kede Ushs. 37,495,000 acikere. Gum dang te bedo tye ni Mampici a’Prime Minister me Uganda i’adwol me tung malo me Uganda te miyo wa Ushs.16.4. Ocwalo pwoc wa atek bot Minister Rebecca Otengo pi cuny aber calo man. Eka cente oraye obot jo/dule ocoye me bedo tye i”Cokere medo kede jo oculu me donyo i’oot te bedo Ushs 39,780,000. Otino Langi mogo ame obedo engineers itung malo kan kede owote gi obin oyubu oot me ka cokere i UTC dong  icente icao gi aromo Ushs. 15million. Joo ocele kede compuni mogo dang te kodo wa kede dok, computer, purojekta, buke coc, alame, radio airtime, kome bedo, tents, otoka, moo kede en okene apol ata. National Planning Authority omio buke plan me Uganda aromo gin pyero abic. Yendo company oketo tek me gwoko ojoga wa pi nino adek ducu abongo oolo.

Cente ame dong oraye ducu akome kede cikere pi cokere man obin obedo Ushs. 123,325,000  ento tic otiye kede en akome ote miyo wa donyo i banya me UShs19million. Akwantabiliti me lim kede jami ducu ame orao pi cokere ni kede yore ame otio kede tye odano inge repota ni nama annex 1.0a. Adong okeli wa banyi adwong twatwal obedo ikapu kede buke akwana ame obin mio dano acelacel ame obedo i cokere ni. Cem kede gi amata dang obin otero wa agwa meicel. Amito pwoyo omema na ame Oyubu Cokere ni pi cuny me dyere ame gin obedo kede naka iyi agiki ote jalo kare gi, gi cing gi ikede en ocele omio yuba otum apwot. Jo ducu ame obedo icokere man dang odano nying gi okom buk ripot ame ayaro botwu ni. Apwoyo Owitong me Lango ame opong i ka cokere iwel me 120 ni kato.

Adwong Won Deo akwayi imia dong kare me wek ami ripot i kom moka ame Langi odonyo kede i ka cokere man. A peru akwano moka a’Lango ni, wek kong akob ni cokere ni pwod i record me Lango obedo pi tyen ma acel ame  Langi opelo kede tam gi ikom ngo agin amito pi anyim gi. Ber a cokere ni ocoko Langi adongo ayam opono itwok piny ducu iwi lobo te kelo paco kan. Diro gi ame okwano kede en Acwec opoki gi ayam olonyo kede orok okene ca okello paco ote keto piny ibuk ame olwongo ni Lango Development Agenda pi mwaka adek tunu kede 2015. Buki en obin otio kede i’LC12 (nyut malo) en ame tam a’Lango tye ogiro iye kan aler wek owibye kede jo ducu ame bino mito tic pi mita a’Lango cak ikacinaca. Ber a’LC12 ocobo naka cuny adwong lobo oweko omako dege atir naka opoto i’Lango te nwongo jol amalu meicel ibot Won Deo kede langi ducu dang te cikere i jami apol bot Lango twatwalere puyu lam iyo Masindi Port-Apac-Lira-Kitgum road. Yoo ni yam pe ‘list a’Bumente ento inino ca Adwong Preciden te golo oda me keto oyot i’list. Maktal tye iwi wan ducu acalo Lango me mako mokoro acel iyi akina moka me LC12 ite tiyo pi ber bedo a’Lango.

Wek dong alokere ikom moka. Moka ducu tye odano ikom ripota ni  number annex1.0b kun otye iyi iryonget angwen apapat kit man:

1.      LOC ME TEKWARO KEDE JAMI ABECO I TEKWARO WA

2.      LONYO PI DONGO LOBO

3.      NGOLLO KOP ATIRA KEDE LOC

4.      MEDDO TEKO WA I YORE APAPAT PI ANYIM

Moka a’Lango ni ame olwongo ni Lango Development Agenda tye kede jami olil me atima pi kelo dongo lobo kede alokaloka abeco ikwo ajowa. Jami me atia ni kite gi tye  SMART (OLIL)kit man:

·       Specific (Okemere atir)

·       Measurable (Pimere)

·       Actionable (Tiye)

·       Respoonsibility (Nga/ngo atio)

·       Time bound (gwok cawa)

Laro lok i’Cokere obin okelo tam apapat ecipan ibot lwak ento tame ni ducu tye ame oguru gi ite guti kop angwen imalu nu kit ame adano kede ikom report piny kani.

Yekko Moka me Cokere a Langi 2012

1.     LOC ME TEKWARO KEDE JAMI ABECO I TEKWARO WA

MWAKA ME ACEL

MWAKA ME ARYO

MWAKA ME ADEK

IRYONEGET AME ALUBU YO KOP MAN

Yikko Pencik anyen me Tekwaro Lango (meddo kede kwer kede jami abeco i tekwaro wa)

Gero ot-ker a Won Nyaci, Ka nyuttu kwogo me Tekwaro Lango, kede wudi pi Owitong

Gero kabedo adit me Tekwaro Lango (Cultural Centre), mampici me Tekwaro Barlonyo, Kangai, Got Ibuje-“Tyen Olum”, Kungu (Jubilee site) kede Got Otuke.

Tekwaro Lango

Gero Centa me Rayo, kweddo kede pokko ngec, kede pwonynyo diro nyo kwiri apapat (Kede dang rayo nying Langi atye kede diro apapat)

 

 

Tekwaro Lango

Neno ni National Curriculum Development Center (NCDC) pe ojwao pwonynyo Leblango, karacel kede lebe okene me Uganda i Cinia 4 kede Cinia 6.

 

 

Lango Language Board (LLB)

 

2.     NGOLLO KOP ATIRA KEDE LOC

MWAKA ME ACEL

MWAKA ME ARYO

MWAKA ME ADEK

IRYONEGET AME ALUBU YO KOP MAN

Nenno ni wat iyi akina wa kede kakki ame oguru wa tye aber dang omedde kede dongo

Kwoggo Oteka me Lango i dipatimen apapat

Kello lyele oteka Langi ame otoo i witim me wek bin yik gii ika yikko oteka i Barlonyo

Tekwaro Lango

Cul pi nek kede yak ame otimere ikom Langi calo bala:

(i)      jo ame oneko ikare Amin,

(ii)    yakko dok kede jo ame oneko ikare me lweny a Kony

 

Ketto Iryongetoro me Ateni, Ngollo Kop Atira kede Gonyere me kweddo bal apapat  ame otimere i Uganda

Tekwaro Lango

Neno ni Langi dang tutte gi opwoo kun dang okwano gi ikin oteka me Uganda, kede dang myero onwong gini tic abeco i gemente a room rwom gi, calo bala (Minicita, Ambacadae, Orane Adongo i Minicitri, Direktae irwom kede iryongette apapat)

 

 

Lango Parliamentary Group

 

3.     LONYO PI DONGO

MWAKA ME ACEL

MWAKA ME ARYO

MWAKA ME ADEK

IRYONEGET AME ALUBU YO KOP MAN

Nenno ni oru ketto lam apwot ya i Macindi Potta beo Apac, wot Lira eka te kato naka Kitgum

Meddo neon ni mac ilingtwic oromo yi dicitrike me lobo Lango ducu

Gero Lekdege me Lira.

Gurup a Langi atye i pliamen

Dwoggo kede nenno ni yika me PRDP omedde i Lango

Medde kede kwedoo tye a mola ame tye it e lobo i lobo Lango

Meddo rwom a yoe me Lira-Otuke-Kotido; kede  Dokolo-Namasale ya i yo-agera dokko lam

Gurup a Langi atye i pliamen

Gero alac ka-ka pwaktori kede ka tetto nyony apapat i Lango

Ketto ka-ka pwaktori kede ka tetto nyony apapat i Lango

 

Tekwaro Lango

Otto otedero pi jalle i program me otim-ikom wa (Aporere, iryonget me Ocan Agenne)

Gero i dicitrik acelacel, pwaktori kede biacara apapat  me agirikaka, kede diro anyen me pur

 

Wegi kom LC5 kede Owitong in Dicitrik acelacel

Otto otin Langi atye i Witim me kubere i nenno ni Ajenda me Dongngo Lango ocobere

Neno ni atekerere acelacel okatto kede rejicita te coyo nying jo mere ducu

 

Tekwaro Lango

Mokko cik me Tekwaro miyo tic karacel kede cik me Uganda akwakko kite me loyo kede tyekko kop ikom lobo

 

Cakko tute Adit bala Boll-icap me Dongngo Lango

Tekwaro Lango

Cakko Amuka Development Corporation

Cakko Lango Media Corporation (Kampuni a Lango Adit me Amut)

Rocco Lira Spinning Mill karacel kede Lira Starch Factory

Tekwaro Lango

Tingo rwon a Lira Town miyo dong dokko Citi.

 

 

Lira Municipality

 

 

4.     MEDDO TEKO WA I YORE APAPAT PI ANYIM

MWAKA ME ACEL

MWAKA ME ARYO

MWAKA ME ADEK

IRYONEGET AME ALUBU YO KOP MAN

Cakko Yunivaciti a Lwak i Lango, kun guti mere occung ikom Caiyanci kede Tet

Myero Gamente nen ni omedo wel otino Lango ame gamente culu i yunivaciti a lwak.

Med rwom a Lira Technical College wek dok Polytechnic kede Centa me Pwonynyo Diro calo bala; Amugo kede Minakulu Vocational Centres te dokko cukule Tekinikol

Gurup a Langi atye i pliamen

Yubbu wudi  i cukule(wudi kwan, me opwonye, coron, etc.)

Yero kede dongngo  cukule mogo i Lango me bedo acalo apor opi cukule okene

Ketto puroguram me Pwonynyo Bulu

Wegi kom LC5 me Dicitrik acelacel

Ketto puroguram me Cikolacip i Lango

 

 

Tekwaro Lango

Gero Lektuku me John Akii Bua

 

 

Wegi kom LC5 me Dicitrik acelacel

Kitto cik atek me nenno ni otedero ogwoko yotkom gi (calo balagero bailo, jukku mero arac, la-la abongo pulan, goyo nak, kede en okene...)

Meddo rwom me tic akwakko jukku Two Jonyo, kede miyo kony kede yen bot jo wa i Lango ame tye kede kuddi CILIM, onyo tye atwoyo Two Jonyo i Lango 

 

Wegi kom LC5 me Dicitrik acelacel

Gero Trauma Treatment Center (Kaka Konynyo jo ame tye kede two me adam onyo two cwiny pi pekki onyo jammi areco ame gin oneno ikare me lweny).

Gero kaka menynyo two Bur-okanne (Cancer) i HC4 ducu kede i dakatale i Lango ducu, kede kaka cangngo cancer dang myero ger i dakatal Adit Lira   

Pwonynyo jo me jollo kede maro yore me kwo ame dongo yotkom calo bala; gweero otino, tic kede tanarwa ame otedo kede yat ober, wot pimere pi mon ayac, kede nenno ni mon onywal i dakatal

Tekwaro Lango

Dwoggo purojeck me pur i cukule

Yayo  Pwam me Gurup, Reny Atera, Kachung kede Aloi Ongom Irrigation Scheme

Dwoggo Cocai (Marketing Cooperatives)

Tekwaro Lango

Ketto Centa me nyayo kede gwokko leyi i Lango

Yikko kede gero iyi Lango dam me kiiro pii ikom koti

 

Tekwaro Lango

Kello iyi lango twakta me pur i rwom a malo, kweri dok, nyony pitto koti, kede twela ame dok wao

Gero pwaktori kede dongngo biacara me biyo nyig yen kede ketto i kebe

 

Tekwaro Lango

Iwiewie, moka tye ongido imwaka imwaka cakere imwaka ni naka 2015 kun dang ocimo iryonget abino tiyo onyo lubu yo cobo moka man. Porere Te Kwaro lango tye kede moka okene ame en bino tiyo ikome acalo yubu pen cik me Te Kwaro. Ocele tye ame en bino lubu yore ibot iryonget ocele me cobo calo lubu yoo wudi Owitong ibot abumente imalu. Lango language Board, Lango Parliamnetry Groyup, Abumente atitino me te dero iyi Lango kan ijo dini kede atekere otye kede moka ame bino wot botgi me atia.

Ineno wa wan joo oyubu LC12, tam wa tye ni me miyo jami tiye apwot kit a’Lango amito kede, myero Te Kwaro cim Committee me Orot Piny (LC12 Resolution Monitors and Evaluators) ikom ame bino kubere kede roto dule apapat ame oketo tic iwi gi ni wek kare ikare gin omi ripot bot Council me Owitong kede Langi ducu. Omema mere romo ya ikom Cabinet a’Won Deo, Owitong, Owibye, Omema me Parliament, odiro tic apapat, joo wa ige pii, bulu, mon, jo dini kede Langi ocele aromo jalo cawa kede gi cing gi pi ber bedo a’Lango. Committee ni tic gi nama acel bino bedo me yubu workplan kede bajet gi (wi cura mere tye oyubu oko iyi book LDA (papara 119) eka ote cwalo botwu kan pi rayo limere polere ibot atekere acelacel iwel awun ibino wunu ye. Omema na me LC12 Steering Committee polgi tye oyubere me bedo Omi Tam bot Committee ni ka mite.

Iyi akina moka magi ducu, yeya me lok iyi acel. Man kop ikom Pen Cik me Te Kwaro. Makatal me yubu pen cik ite moka me LC12 tye oweko iwi wu wun Owitong. Langi tye akuru pen ciki kun okudu weo gi oko pien en pen ciki en ame bino twenyo loc me Te Kwaro I’Lango aber. Myero wun Council icim wunu Commitee me Owitong kede Omii Tam gi angeo cik me oyot dang kan aler, ote miyo gi yo tic (Terms of Reference) kede jami tic kede kare me tic joni te bebea iyi atekere 152 ni ducu i’Lango kan kun orao tam eka ote coyo draft constitution me anyama inyim wu kan. Abongo mano obino rwaco gen a’Lango oketo ikom wa  ni i’rwac.  

Ka dong awoto bala atyeko ripoti, amito ni atwe te kopa ni kit eni:

1.      Adwoko pwoc bot Won Deo won Kwogo Won Nyaci wa me Lango Adwong Yosam Odur Ebii pi neno me atut ape twere oweko en otute atek me kelo Lango karacel ite loc me Te Kwaro naka tunu kede I’Cokere Adwong olwongo Lango Conference 2012. En Te Kwaro keken en ame noto Lango kadi do bedi wi bie, dini, atekere i’jami ocele papat opokowa. Ngec a’ Won Deo tye aneno anyim kun tamere ocung ka i noto kede dongo Lango. Apwoyo Adwong pi kwiri ni kede cuny aber ame itye inyutu ikom jo ni pi kare ducu. Wia dang pe wil kede Prime Minister wa me Te Kwaro Adwong Col (Owe) Tony Otoa pi diyo cunye medi me omema ducu me Steering Committee oweko LC12 otum apwot.

2.      Adwoko pwoc botwu wun Owitong pi gen ame ibin iketo wunu ikom wan 72 ite cimo wa me youbu cokere. Pe obediwa ayot me timo ento dang otum kit adong otum kede nu. Apwoyo wu pi cwak ame ibedo wunu miyo wa ame ojingo cung w ate miyo wot anyim kede yuba.

3.      Kwac wa tye ni me oyot myero wun Otela me Te Kwaro Otyek me oyot atubatuba ame tye iyi akina wu ame okello ryang cuny adwong bot Langi ducu dang the bwot balo LC12. Apokapoka pe bino miyo wa cobo mita a’Lango agin opelo kede i’LC12 ni. Bino bedo me Lewic atek ka iyo nge mwaka adek tunu 2015 pe tye ginoro ame obino nyuto ame cimo ni ocobo mita a’Lango. Otela ye ture ote dwogo piny me bedo karacel ite loc acel kun dog gi acel, tam gi acel mita gi dang acel. Yubu loc me Te Kwaro myero cakere iyi atekere acelacel kun yin Awitong itye ame inoto joni iyori pi tic aber ame itye itimo. Pe dang ipok atekere ni ikom Lango pien wun keken pe iromo twero wunu kwo ka ibedo keken wu. Ikakan dang yeya wunu me dwoko pwoc bot Bishop JC Odur Kami me Kineno me Lango kede owote mere okwat i’dini apapat pi tute gi me temo noto otela me Te Kwaro ikare atelo tol ocek wokca. Akwayo gi me pe ool pien tic pwod tye.

4.      Committee me Orot Piny (LC12 Resolution Monitors and Evaluators) ame ibino wunu cimo me lubu yo cobo moka a’Lango ni myero imi gi wunu kare me bebea iyi Lango ducu me rabo bot Langi iyi eryonget gi apapat calo atekere, ocoo amut, dule ape jengere ikom abumente, ocatwil, bulu, otino kwan ikede en ocele me wek joo ducu winy icuny gi ni moka tye pi ber bedo a’lwak.

5.      Me miyo Committee me Orot Piny (LC12 Resolution Monitors and Evaluators) tiyo tic aber kit amite wun myero iyubere wunu me rayo lim ite miyo gi wunu. Pol kare ducu dang myero ibed wunu cwako kor gi wek gin oti tic ame imio gi wunu icuny opye abongo lworo.

6.      Otela ame Won Deo oketo itic kede en ame en bino keto itic me Te Kwaro myero mi gi pwony oromo i’kite me tic me wek dano acel acel niang kan ame ecako iye ete gik iye abongo kelo dipo wic. Polere dang myero cim gi i’waraga ame nyutu ngo agin obedo. Man bino weko tic ikom moka a’Lango bedo yot pien ni nwongo otela tye akode aber meicel. Polere wok otela ni myero pwony gi idiro me ooto lim kede Omii Tam Adongo kede otic diro apapat kelo i’Te Kwaro wek jing Te Kwaro pe bed ayot kit atye kede kombedi.

7.      Te Kwaro myero kub wat kede dule apapat amaro ber bedo a’Lango me yenyo yoo me jwiko me oyot gero me yi oot kede lara lobo aman otany woki ame tye akelo can apol iyi Lango woki. En kodi jami areco ni en ame tye adwoko Lango cen.

Yeya wunu dong kare me keto imi meja me Council wu kan buke aryo: Report me LC12 kede Lango Development Agenda.

Apwoyo wu atek pi winya.

Awitong Eng. Dr. Michael Odongo Okune

AWITIM ME LANGO

CHAIRMAN STEERING COMMITTEE LC12

22 Febraury 2013

 

NOTE EN TEKO


Recent Podcasts

Recent Videos

5370 views - 1 comment
5762 views - 1 comment
8484 views - 14 comments

Useful Links